A SD Compostela reforzou este domingo o seu liderado na liga tras superar por 3-1 ao Viveiro CF no estadio de San Lázaro, nun encontro que serviu para pechar a primeira volta do campionato sen coñecer a derrota. O conxunto compostelán encadea así a sexta vitoria consecutiva e amplía a súa vantaxe na clasificación ata os dez puntos sobre o segundo clasificado.
O partido comezou cun claro dominio do equipo local, que xerou varias ocasións de perigo nos primeiros compases. Antón Guisande, Armental, Maceira e Goris tiveron opcións para abrir o marcador, pero o porteiro visitante evitou o gol con diversas intervencións decisivas. Cando parecía que o encontro se encamiñaba ao descanso con empate, o conxunto mariñán aproveitou unha transición rápida tras un saque de falta do Compos para adiantarse cunha carreira de Esquerdeiro, establecendo o 0-1.
Tras o paso polos vestiarios, a SD Compostela mantivo a iniciativa e incrementou a presión ofensiva. A entrada dos primeiros cambios resultou determinante, especialmente a de Rosón, que asinou un destacado debut como xogador compostelán. Nun treito de apenas dez minutos, o equipo local conseguiu darlle a volta ao marcador con tres accións consecutivas de gol.
O empate chegou no minuto 71, cando Parapar filtrou un balón ao espazo para Armental, que avanzou pola banda e asistiu con precisión a Maceira, autor do 1-1 a porta baleira. Só tres minutos despois, o propio Armental volveu ser protagonista cun novo servizo interior para Maceira, que superou ao gardameta e marcou o 2-1, completando o seu décimo gol ligueiro.
A sentenza produciuse no 78, cunha acción iniciada por Antón Guisande, que gañou a espalda da defensa e cedeu para Cañi, quen definiu con tranquilidade para establecer o 3-1 definitivo. Coa vantaxe no marcador, o ritmo do encontro diminuíu ata o asubío final.
