A SD Compostela anunciou a incorporación do lucense David Rosón Fernández como novo xogador do primeiro equipo. O mediocentro chega procedente do CD Lugo, entidade á que estivo vencellado desde idade infantil, e asinou un contrato ata o remate da presente tempada, con opción de continuidade por unha campaña máis.
Rosón reforza a medular do conxunto compostelán cun perfil de centrocampista de percorrido, capacidade para a asociación e bo manexo do balón. Aínda que o seu rol habitual é o dun ‘8’, tamén pode actuar en posicións máis retrasadas na base da xogada, unha polivalencia que lle permite adaptarse a diferentes contextos tácticos.
Na primeira metade da tempada actual, o futbolista lucense formou parte do cadro do CD Lugo en Primeira Federación, chegando a participar nun encontro oficial de Liga. Ese foi o seu último capítulo no club no que se formou desde os 12 anos, tras ir superando categorías ata alcanzar o primeiro equipo.
O seu debut como xogador sénior produciuse na tempada 2022/23, cando con 19 anos se converteu nunha peza fixa do filial lucense en Segunda Federación. Naquel curso disputou 33 partidos e asinou dous goles. A súa continuidade como titular mantívose na campaña seguinte en Terceira RFEF, con 32 encontros e tres tantos, rendemento que lle abriu as portas do primeiro equipo, co que chegou a disputar dous partidos oficiais en Primeira RFEF.
Á súa traxectoria en Lugo súmase tamén unha cesión ao Don Benito a pasada tempada, onde tivo un papel destacado en Segunda Federación, con 26 partidos, dous goles e tres asistencias, acumulando minutos e experiencia en categoría nacional.
David Rosón incorpórase agora ao Compos coa intención de recuperar o seu mellor nivel competitivo e contribuír aos obxectivos deportivos do equipo nesta segunda parte do curso. O xogador xa se suma aos adestramentos e, se así o estima o corpo técnico, podería estar dispoñible para debutar este domingo no estadio Vero Boquete, diante da afección compostelá.
