A SD Compostela continúa a súa xeira imparable e sumou unha nova vitoria fóra da casa ao impoñerse por 0-2 ao Alondras CF no campo do Morrazo. O equipo dirixido por Yago Iglesias mostrou unha gran solidez defensiva e eficacia ofensiva, logrando tres puntos que lle permiten seguir invicto e liderando a clasificación con 20 puntos.
O partido comezou de forma inmejorable para o cadro compostelán. Aos 6 minutos, o capitán Samu abriu o marcador cun potente disparo dentro da área, tras unha asistencia medida de Parapar. Foi o seu primeiro gol nesta tempada e converteuno no undécimo xogador do equipo en marcar na competición ligueira.
Lonxe de conformarse coa vantaxe, o Compos seguiu buscando o segundo tanto. Maceira estivo a piques de ampliala cun cabezazo ao pau, pero o premio chegou pouco antes do descanso. O dianteiro vigués, moi activo durante todo o encontro, anotou o 0-2 tras aproveitar un rexeite dentro da área, logrando así o seu terceiro gol na liga e segundo consecutivo.
Na segunda metade, os branquiazuis controlaron o ritmo do xogo e souberon conservar o resultado sen apuros, coa defensa firme e un Álex Cobo moi seguro baixo paus. Mesmo tiveron ocasións para ampliar a renda, pero o marcador non se moveu.
Con este triunfo, a SD Compostela mantén a portería a cero por segunda vez consecutiva e afianza o seu liderado na categoría. O próximo compromiso será no Vero Boquete de San Lázaro, onde os composteláns recibirán ao Barbadás, coa intención de prolongar a súa racha de invencibilidade.
