O Monbus Obradoiro asinou a súa primeira tarde tranquila da tempada no Multiusos Fontes do Sar. O equipo de Diego Epifanio ‘Epi’ superou con claridade ao Melilla Ciudad del Deporte (79-59) nun encontro que rompeu definitivamente no terceiro cuarto, cando a defensa compostelá secou por completo ao conxunto visitante. Foi a segunda vitoria do curso para os galegos e a primeira ante o seu público, un triunfo que serve para equilibrar o balance (2-2) e afastar as dúbidas deixadas nas dúas primeiras xornadas.
O duelo comezou con forza e cun protagonista claro: Léo Westermann. O base francés, que exerceu de director e anotador, inaugurou o marcador cunha asistencia a Felipe dos Anjos e un triplo propio (5-0). O Melilla reaccionou con acerto de Poirier e Stumbris, chegando incluso a poñerse por diante (5-7), pero o Obra respondeu cun parcial de 9-0 que marcou o ton da tarde. A intensidade defensiva e a velocidade de Sergio Quintela marcaron o ritmo dun primeiro cuarto no que os locais mandaron sen excesivos apuros (21-16).
No segundo período mantívose o guión. O Melilla Ciudad del Deporte sobrevivía grazas a accións illadas de Heron e Córdoba, mentres que o Obra atopaba fluidez na conexión entre Westermann e Dos Anjos, un tándem que volvería ser decisivo. Brito e Barrueta ampliaban a fenda desde o perímetro, aínda que unha polémica antideportiva sinalada a Quintela e un triplo final de Stilma permitiron aos visitantes achegarse antes do descanso (39-32).
Tralo paso polos vestiarios, o Obradoiro puxo a directa. Un parcial de 24-9 no terceiro cuarto fixo saltar por completo o marcador. A defensa local convertíase nun muro e o ataque fluía con facilidade, con Galán, Barrueta e Dos Anjos castigando a un rival sen resposta. O pívot brasileiro, dominante baixo o aro, alcanzou os 17 puntos e 10 rebotes, mentres Westermann completaba tamén o seu dobre-dobre con 11 puntos e 10 asistencias. Ao remate do terceiro período o resultado (63-41) deixaba o encontro sentenciado.
O último cuarto foi pouco máis que un trámite. Epi repartiu minutos e mesmo deu entrada ao canteirán Rodrigo Díaz para debutar co primeiro equipo. Brito e Galán completaron a exhibición ofensiva dun Obra coral, que chegou a ter vantaxes de ata 28 puntos antes de que o Melilla maquillase lixeiramente o marcador final.
O 79-59 final reflicte o dominio compostelán e o paso adiante dun equipo que comeza a mostrar o seu potencial real. A conexión Westermann–Dos Anjos, o equilibrio colectivo e a solidez defensiva foron as mellores novas para un Obradoiro que volve sorrir en Sar e mira xa con optimismo o calendario, coa Copa e a visita ao Estudiantes no horizonte inmediato.
