A SD Compostela continúa imparable no Verónica Boquete de San Lázaro. O conxunto branquiazul sumou este domingo o seu terceiro triunfo como local ao derrotar por 2-0 ao Club Silva SD, nun encontro dominado de principio a fin que consolida aos santiagueses como líderes do Grupo 1 da Terceira Federación, con 13 puntos tras cinco xornadas.
O equipo compostelán impuxo o seu xogo dende o inicio e atopou o premio nos minutos finais da primeira metade. Maceira, que debutaba como titular, abriu o marcador no minuto 41 cun cabezazo á rede tras un centro de Armental, anotando así o seu primeiro gol da tempada.
Na segunda parte, o Compos seguiu controlando o ritmo e ampliou distancias no minuto 73 grazas a Antón Guisande, que aproveitou un balón á espalda da defensa para bater a Mini Buggi no man a man e poñer o 2-0 definitivo. Foi o segundo tanto do dianteiro en liga, confirmando o seu bo momento de forma.
O encontro, presenciado por 1.367 espectadores, apenas tivo sobresaltos para a defensa compostelá, que manteu a portaría a cero e certificou o cuarto triunfo en liga. O árbitro, Adam Rodríguez (Ourense), amonestou unicamente ao gardameta local Álex Cobo.
Co liderado reforzado, a SD Compostela visitará a próxima fin de semana o Gran Peña, coa intención de prolongar a súa boa xeira e seguir na parte alta da táboa clasificatoria.
