O Monbus Obradoiro non puido estrear cunha vitoria a liga en Fontes do Sar, caendo ante o Grupo Alega Cantabria por 82-87, nun encontro que se decidiu tras o intermedio. O equipo de Diego Epifanio ‘Epi’ marchou con vantaxe mínima ao descanso (44-43), pero sufriu un apagón ofensivo no regreso dos vestiarios: 12 puntos no terceiro parcial e moito castigo dende o arco cántabro. Co 0-2 no arranque da Primera FEB, en Compostela paira a sensación de ocasión perdida nunha noite na que pesou a ausencia do pivote Goran Huskic.
O choque arrincou cos visitantes marcando territorio de tres e cun Jassel Pérez xa protagonista. Westermann e Quintela responderon para equilibrar a apertura, e a rolda de trocos permitiu ao Obra colleitar unha pequena renda (21-19) ao peche do primeiro acto. No segundo cuarto medrou a figura de Felipe dos Anjos, que asumiu galóns por dentro, e un estalo anotador de Yunio Barrueta abriu a fenda ata o 38-30. Co pavillón empuxando —escoitouse un “Palestina vencerá” nas bancadas— Pérez mantivo vivo o Alega e foise ao descanso con 20 puntos, deixando todo por decidir.
A clave estivo ao volver: o Alega acelerou dende a longa distancia (Johnson, Powell e Hernández) e o terceiro cuarto converteuse nunha pendente para o conxunto compostelán (12-25). Barcello tratou de suxeitar a ofensiva local cun 2+1 e tiros liberados, mais os visitantes atoparon sempre resposta exterior e chegáronse a poñer +14 (56-70) xa no derradeiro parcial. O Obra intentou a remontada cun parcial de 7-0, pero os nervios —con técnicas a Barcello e Westermann— e a frialdade cántabra nas últimas posesións fixeron o resto.
No tramo final, Quintela sumou dende a liña para estreitar (69-76) e Dos Anjos fixo dano baixo o aro, mais Pérez asinou o trinta con dous triplasazos en momentos quentes e o Alega administrou o reloxo ata o 82-87 definitivo. En números, Barcello (25), Quintela (17), Westermann (12) e Dos Anjos (12) levaron o peso anotador obradoirista; polo bando cántabro, ademais do dominicano, brillaron Johnson (15), Powell (13) e Kande (10). O santiagués Pablo Hernández deixou 7 puntos na súa visita a Sar. Os parciais foron 21-19, 23-24, 12-25 e 26-19.
Tras o choque, Lolo Encinas puxo o foco na viraxe tras o descanso e no carácter do seu equipo: “No terceiro cuarto baixámoslles os puntos; a clave foi o nivel defensivo e ir ao barro”, dixo, antes de relativizar o impulso do seu equipo: “Nin fomos os da semana pasada nin somos os Lakers agora”. Sobre o impacto do seu novo exterior, engadiu: “Levaba 48 horas connosco; sabiamos a calidade que tiña e axudounos a xogar mellor”.
Pola súa banda, Epi abriu a súa comparecencia de prensa posterior ao partido cunha mensaxe á bancada: “Pedimos desculpas aos nenos e á nosa afección polo malentendido do saúdo final; non volverá pasar”. No plano deportivo, o técnico admitiu o burato do terceiro período e a falta de acerto: “Un cuarto de 12-25 é moito castigo; buscamos tiros liberados pero non entraron”. Sobre a esixencia do proxecto e as baixas, foi claro: “A presión existe e asumímola; sen poñer escusas, debemos sacar máis rendemento ao que temos mentres chega o recambio de Goran”.
O calendario non dá tregua e o Monbus Obradoiro deberá reaccionar fóra da casa para evitar que as dúas derrotas iniciais se convertan en tendencia. Co equipo “feito po”, como recoñeceu o adestrador, o reto inmediato pasa por recuperar consistencia mental, subir a productividade no rebote e manter o ADN de compartir o balón sen renunciar ao físico que demanda a categoría. En Sar quedou a proba: cando o perímetro visitante manda e o acerto falla, o partido marcha. A próxima oportunidade, lonxe de Santiago, medirá a resposta dun vestiario que prometeu erguerse e competir mellor.
