No marco das celebracións da ‘Noite Galega das Persoas Investigadoras 2024’ (G-Night), a Real Academia Galega de Ciencias (RAGC), en colaboración coa Universidad Intercontinental de la Empresa (UIE), celebrou o pasado venres unha conferencia baixo o título ‘O metro patrón calculado por un galego do século XIX’. O acto tivo lugar na sede de Afundación da rúa do Vilar, impartido polo investigador da Universidade da Coruña Xabier Pérez Couto.
A charla abordou a contribución de José Rodríguez González, coñecido como o “Matemático de Bermés”, un dos científicos europeos máis destacados da súa época. Rodríguez participou en proxectos de gran relevancia, como a medición do meridiano de Dunkerque a Barcelona, esencial para o establecemento do metro como unidade de lonxitude, un sistema que revolucionou as medidas universais.
Rodríguez enviou á Universidade de Santiago un metro de cobre subdividido en milímetros, que se custodia na facultade de Física. Ademais, contribuíu á demostración de que a Terra está achatada nos Polos, un feito probado por el mediante cálculos matemáticos en 1812. O evento é parte das actividades que a RAGC organiza para destacar a súa figura como “Científico Galego do Ano”.
