Este venres 27 de setembro celebrarase en Santiago de Compostela a terceira edición do proxecto Sensoxenoma24, un evento pioneiro que combina música e ciencia. Organizado en colaboración coa Real Filharmonía de Galicia e o Auditorio de Galicia, o proxecto busca analizar como a música afecta á expresión dos xenes a través de mostras biolóxicas recollidas antes, durante e despois do concerto. Desde o inicio do proxecto no ano 2022, xa se recolleron máis de 3.000 mostras de sangue e saliva.
Nesta nova edición, ademais da actuación da Real Filharmonía de Galicia baixo a dirección de Baldur Bronnimann, participará por primeira vez a Banda de Música de Santiago de Compostela. O concerto terá dúas partes musicais de 30 minutos cada unha, e os investigadores recollerán mostras de sangue, saliva e, por primeira vez, lágrimas dos asistentes voluntarios para comparar o impacto da música en diferentes tecidos biolóxicos.
Ademais, este ano tamén se introducirán sensores sen fíos para medir parámetros como a actividade electrodérmica, o ritmo cardíaco e a tensión arterial en tempo real. Segundo o catedrático da USC Antonio Salas, “este concerto experimental permitirá por primeira vez correlacionar datos fisiolóxicos con moléculas de RNA e proteínas, ampliando os horizontes da investigación biomédica”.
Os interesados poden inscribirse a través da web do proxecto Sensogenomics.com. Ademais, hai 800 entradas dispoñibles para o público xeral a un prezo de 5 euros nas billeteiras do Auditorio e en Compostela Cultura.
