O VI Festival de Música Antiga e Barroca Ateneo Barroco, organizado polo Ateneo de Santiago, foi inaugurado hoxe coa presenza do director xeral de Cultura, Anxo M. Lorenzo, quen convidou á cidadanía a achegarse á capital galega para “gozar da cultura e da música neste encontro ao que se van achegar artistas destacados desta modalidade musical”. O festival, que se prolongará ata o 16 de outubro, conta coa colaboración da Xunta de Galicia e ofrecerá concertos e actividades en diversos espazos da cidade.
Durante a inauguración, Lorenzo destacou a importancia deste certame, que chega á súa sexta edición, para o apoio e reactivación do sector musical en Galicia. “A través de festivais coma este, impulsamos todos os xéneros musicais, promovendo un maior acceso á cultura”, sinalou. Así mesmo, puxo en valor o labor do Ateneo de Santiago, cualificándoo como “un espazo consolidado de entendemento e coñecemento que contribúe a difundir e poñer en valor a nosa cultura”.
CONCERTOS E ACTIVIDADES COMPLEMENTARIAS
O festival, que leva organizándose de xeito ininterompido durante 6 edicións, inclúe unha variada programación de concertos que se desenvolverán en diferentes escenarios. O mércores, 2 de outubro, terá lugar no Paraninfo da Facultade de Xeografía e Historia a actuación da soprano Roberta Invernizzi, o tenor Marcello Nardis e o grupo Ars Atlántica baixo a dirección de Manuel Vilas. Outras actuacións destacadas inclúen a de Concert le Phénix e Fernando Santiago o sábado 5 na igrexa da Universidade, e El Afecto Ilustrado e Adrián Linares o martes 15 no mesmo espazo.
O Teatro Principal será outro dos escenarios principais, acollendo concertos como os de Dolce Rima o luns 7, Diego Ares o martes 8, e La Reverencia con Andrés Alberto Gómez o sábado 12 de outubro.
Ademais dos concertos, o festival inclúe unha serie de actividades complementarias, entre as que destacan conferencias, un club de lectura, proxeccións e improvisacións, co obxectivo de achegar aínda máis a música antiga e barroca ao público galego.
