A Cidade da Cultura de Galicia pecha as portas da exposición ‘Tesouros Reais’, unha das principais apostas expositivas do Museo Centro Gaiás deste ano, que atraeu preto de 40.000 persoas, cunha media diaria de 338 visitantes.
Segundo informou a Xunta, esta cifra sitúa a mostra entre as máis visitadas na historia do Museo Centro Gaiás, xunto a outras como ‘Faraón. Rei de Exipto’ e ‘Galicia, un relato no mundo’. A exposición internacional, que en España só se puido visitar en Santiago de Compostela, continuará o seu exclusivo circuíto en Florencia, antes de viaxar a outras dúas cidades: Lisboa e un destino en Estados Unidos aínda por revelar.
A elevada demanda do público levou a programar 351 visitas comentadas, un número que representa “unha oferta sen precedentes” nos doce anos de historia do Museo Gaiás. Desde a inauguración de ‘Tesouros Reais’ o 21 de marzo, preto de 10.000 persoas participaron nalgunha destas visitas, ofrecidas de maneira gratuíta polo Servizo de Mediación da Cidade da Cultura.
A mostra, inaugurada polo presidente da Xunta de Galicia, Alfonso Rueda, o nuncio do Vaticano en España, Bernardito Auza, e o custodio de Terra Santa, Francesco Patton, foi visitada por persoas de 63 países diferentes. Ademais, atraeu a importantes institucións culturais internacionais, como a Frick Collection de Nova York e medios especializados globais como National Geographic, que organizou en Santiago de Compostela unha das súas Experiencias Únicas.
A exposición destacou polas súas conexións entre Xerusalén e Santiago de Compostela, dous dos principais destinos de peregrinación cristiá, e incluíu pezas do patrimonio galego que subliñaban estas relacións históricas. Durante a mostra, leváronse a cabo tarefas de restauración en varias obras de Galicia, entre elas catro maquetas de madeira e nácar, varias cruces e un relicario dos mesmos materiais, así como unha pintura do século XVIII titulada ‘San Francisco ante o altar de Santiago’.
‘Tesouros Reais’ permitiu tamén dar maior visibilidade a obras galegas de gran relevancia histórica pero pouco coñecidas polo público, como unha das maquetas máis detalladas do mundo da Basílica do Santo Sepulcro, pertencente aos fondos do Museo de Terra Santa de Compostela, actualmente pechado ao público.
