O ciclo ‘Verán en Familia’ da Cidade da Cultura chega ao seu fin este mércores, 31 de xullo, co espectáculo ‘De Vilatriste a Vilalegre’, da Utópica Rodante, unha representación que se enmarca tamén na campaña CulturON da Xunta.
O espectáculo ‘De Vilatriste a Vilalegre’ é unha proposta escénica que compara a fantasía coa realidade social do rural galego mesturando teatro de rúa, monicreques e humor. A cita terá lugar no Xardín do teatro ás 19:00 horas e a entrada é libre e gratuíta. A Cidade da Cultura convértese así nunha das máis de 100 sedes que acollen este espectáculo con motivo da celebración do 40º aniversario do Centro Dramático Galego.
Esta é, ademais, a cuarta e última das xornadas que completan unha programación estival no Gaiás á que xa asistiron máis de 2.000 persoas ao longo do mes de xullo, e que converteu á Cidade da Cultura nun espazo diversión para todos os públicos con espectáculos de circo, música e teatro de compañías galegas, estatais e internacionais.
