A noite do próximo 14 de setembro, as 15 cidades do Grupo de Cidades Patrimonio volverán acoller ‘A Noite do Patrimonio’, un evento que persegue pór en valor a cultura destas localizacións. Así o afirmou este martes a presidenta do grupo e alcaldesa de Santiago de Compostela, Goretti Sanmartín, na presentación da programación do evento, celebrada na compostelá Casa das Máquinas.
“É un evento que é un exemplo de como a suma de historia, linguas, talento, creatividade e innovación fai que todas as nosas cidades sexan lugares únicos para vivir, para gozar e para visitar”, engadiu a alcaldesa.
A INICIATIVA EN DETALLE
‘A Noite do Patrimonio’, unha iniciativa que se celebrou por primeira vez en 2018, conta co apoio do Ministerio de Cultura como colaborador principal e con Paradores de Turismo como socio estratéxico. Entre as cidades que integran a quincena de localizacións que conforman o programa atópanse localizacións como Santiago de Compostela, Ávila, Toledo, Tarragona e Segovia.
A proposta axunta en si mesmo tres tipos de actividades distintas: xornadas de portas abertas de monumentos, unha gran oferta cultural de lecer nos centros históricos e ‘Escena Patrimonio’, un festival e plataforma de creación para a danza en espazos patrimoniais. A semellanza do ano pasado, a programación artística complementarase con talleres gratuítos de iniciación á danza para todos os públicos, así como actividades dirixidas a profesionais e estudantes de danza que impartirán os artistas convidados a ‘Escena Patrimonio’.
‘A NOITE DO PATRIMONIO’ EN SANTIAGO DE COMPOSTELA
No relativo ás actividades que acollerá Santiago de Compostela, os interesados en participar no evento poderán realizar visitas guiadas a talleres de artesanía e paseos guiados en espazos emblemáticos da cidade. Na mesma liña, tamén levarán a cabo visitas a espazos considerados como “patrimonio invisible” e quen o desexen poderán gozar da actuación do bailarín e coreógrafo Israel Galván dos Reyes na Casa das Máquinas. Este é un espazo, aberto ao público hai un mes, que a alcaldesa resaltou pola súa “singularidade” e por ser “unha das mostras máis emblemáticas do modernismo en Compostela”.
