A Cidade da Cultura inaugurará este venres 12 de xullo unha exposición sobre cultura viquinga con pezas arqueolóxicas únicas prestadas por ata 13 institucións e coleccións cedentes de obra, entre eles museos nacionais de Historia e Arqueoloxía de Suecia, Dinamarca, Francia e España. Co título ‘Unha vida viquinga’, a exposición articula un relato “máis rico e diverso” sobre esta cultura escandinava. Así, segundo detallou a Xunta nunha nota de prensa, apoiándose nas investigacións históricas máis recentes, cuestiona estereotipos que rodean este pobo, ampliando a imaxe que os presenta como bárbaros violentos.
A través dun enfoque narrativo novo, explora aspectos como a participación das mulleres e, non só dos homes, nas campañas guerreiras ou a mestura con pobos de puntos como o norte de África ou o sur de Europa, entre outros. A exposición, que o público poderá visitar no Museo Gaiás a partir do venres e ata xaneiro de 2025 de maneira grauita, está comisariada pola doutora Irene García Losquiño, investigadora da USC e especialista en cultura viquinga.
Xunto a ela, destacou o Executivo autonómico, o proxecto vén avalado por un comité científico internacional con algunhas das autoridades máis respectadas neste campo, como o catedrático de Arqueoloxía da Universidade de Uppsala, Neil Price; a tamén profesora da Universidade de Uppsala, Charlotte Hendenstierna-Jonson; ou a catedrática de Arqueoloxía Medieval da University of Highlands and Islands, Alexandra Sanmark.
Ademais, ‘Unha vida viquinga’ achégase tamén ás incursións escandinavas en Galicia entre os séculos IX e XII, profundando no seu impacto na súa historia e mostrando pezas que pretenden axudar a entender como esta civilización se estendeu polo continente europeo, e máis aló das súas fronteiras, e deixou tamén a súa pegada en Galicia, en forma de vestixios no patrimonio material e inmaterial, por exemplo en zonas como a ría de Arousa, a ribeira do Ulla ou a Mariña lucense.
