A Cidade da Cultura de Galicia ofrecerá no concerto de Budiño, programado para o Día da Música, mochilas vibratorias equipadas con tecnoloxía para mellorar a experiencia musical de persoas con discapacidade auditiva ou con perda auditiva.
Tal como explicou a Xunta, a medida enmárcase naquelas impulsadas pola Consellería de Cultura, Lingua e Xuventude para conseguir os obxectivos da futura Lei de Cultura Accesible e Inclusiva de Galicia. Será este venres, día 21 de xuño, cando O Gaiás disporá na súa praza central dun punto de accesibilidade, onde os interesados poderán probar esta tecnoloxía.
As mochilas están equipadas cunha receptor FM que permite ás persoas sentir no seu corpo as vibracións da música, facilitando que gocen dunha mellor experiencia musical. Tamén permiten mellorar a calidade de escoita de persoas con audífonos ou implantes a través dun colar conectado á mochila.
“O uso destas mochilas súmase a outro tipo de iniciativas coas que a Cidade da Cultura está a traballar para mellorar a súa accesibilidade, moitas delas en colaboración coa Federación de Asociacións de Persoas Xordas de Galicia”, reivindicou o Goberno galego.
