O Museo Centro Gaiás, na Cidade da Cultura de Santiago, incorporará a finais de outubro unha nova exposición dedicada á arte galega que permitirá contemplar na capital obras pertencentes á colección do Museo Nacional Centro de Arte Reina Sofía. A mostra reunirá preto de 40 pezas e permanecerá aberta ao público ata marzo de 2027.
Baixo o título de ‘Ser Noutras’, o proxecto propón un percorrido colectivo construído a partir de 18 diálogos entre distintas xeracións de artistas. A exposición colocará en relación obras de creadoras e creadores galegos presentes nos fondos do museo estatal con traballos de artistas contemporáneos seleccionados para desenvolver novas pezas especificamente para esta iniciativa.
En total, está prevista a incorporación de ata 15 obras e instalacións de nova creación, que se presentarán por primeira vez no marco da exposición compostelá. A proposta busca así establecer conexións entre diferentes momentos da produción artística galega a través da confrontación e convivencia entre obras xa integradas en coleccións públicas e intervencións realizadas na actualidade.
A mostra está comisariada por Verónica Santos Farto e Chus Martínez Domínguez, profesionais vinculadas á historia da arte, ao comisariado e á xestión cultural.
Entre os fondos do Reina Sofía que chegarán temporalmente ao Gaiás figuran pezas de artistas que forman parte da historia da arte galega do século XX, entre elas Maruja Mallo, Arturo Souto, Julia Minguillón e Virxilio Viéitez.
O percorrido incluirá tamén traballos de autores e autoras de etapas posteriores, como Berta Cáccamo, Menchu Lamas, Francisco Leiro, Carme Nogueira ou Salvador Cidrás, configurando unha selección que abrangue diferentes linguaxes, disciplinas e momentos da creación artística galega.
A estas obras sumaranse as producións concibidas expresamente para ‘Ser Noutras’ por unha nova xeración de artistas. Entre os nomes participantes atópanse Mar Vicente, Lois Patiño, Mar Ramón Soriano, Jacobo Bugarín, Julia Huete, Kiko Pérez e Yoseba Muruzábal.
