A Casa das Máquinas volverá ser o escenario principal do festival FunFunFun o vindeiro 6 de xuño, nunha nova edición coa que este proxecto compostelán de cultura gráfica e autoedición acada a súa oitava edición e reforza a súa presenza como cita de referencia en Galicia e no norte de Portugal. O evento, impulsado pola asociación Metrópoles Delirantes e apoiado polas concellerías de Xuventude e Centros Socioculturais do Concello de Santiago, desenvolverase ao longo de toda a xornada cun programa que combinará feira de autoedición, concertos, faladoiros, actividades formativas e espazos de reflexión sobre o sector creativo.
Durante a presentación oficial, a concelleira de Xuventude, María Rozas, destacou a consolidación do festival e o seu crecemento continuado, subliñando que apoiar iniciativas deste tipo permite “incentivar ese talento que temos” e ofrecer á mocidade espazos para desenvolver o seu potencial artístico. Rozas incidiu ademais na dimensión internacional do encontro, que facilita conexións con creadoras e creadores de Galicia, Portugal, Cataluña ou Euskadi dentro da defensa da cultura independente.
Pola súa banda, o concelleiro de Centros Socioculturais, Xan Duro, puxo o foco na ampliación da colaboración municipal a través dunha programación previa de obradoiros repartidos por distintos barrios de Santiago. Estas actividades desenvolveranse durante o mes de maio nos centros socioculturais de Vite, Santa Marta, Maruxa e Coralia e Fontiñas, con participación de figuras como Manel Cráneo, Inés Vázquez, Paula Mayor e Cristian Caruncho. Segundo explicou, esta extensión territorial busca democratizar o acceso á creación gráfica e achegar novos públicos á rede sociocultural da cidade.
A organización destacou tamén o volume de interese xerado pola feira de autoedición, que segundo explicou Neves Rodríguez recibiu unha demanda de participación catro veces superior á capacidade actual do espazo. A feira abrirá ao público entre as 12:00 e as 22:00, aínda que a montaxe comezará ás 11:00, e incluirá actividades como sesións sobre xogos de rol, concertos sorpresa, encontros profesionais sobre asociacionismo entre Galicia e Portugal, faladoiros con referentes da autoedición portuguesa e o xa habitual “combate de debuxantes”.
Entre as novidades desta edición figura a imaxe gráfica do festival, realizada por Elías Taño, artista e cartelista recoñecido internacionalmente, ademais da incorporación de novas propostas musicais como o concerto de clausura da banda Foul.
Dende a organización fixeron especial fincapé na vontade de seguir convertendo Santiago nun punto de encontro para a creación gráfica atlántica, mantendo a conexión co panorama portugués como un dos sinais de identidade do proxecto. Neste sentido, o festival pretende non só funcionar como espazo festivo, senón tamén como plataforma de colaboración e debate arredor da situación da ilustración, a precariedade do sector e o impacto da intelixencia artificial xerativa sobre os dereitos das persoas creadoras.
As responsables do evento lembraron ademais o carácter colectivo e autoxestionado do festival, impulsado maioritariamente por mulleres dentro dunha asociación sen ánimo de lucro, reivindicando o traballo organizativo que permite a continuidade dun proxecto que, once anos despois da súa creación, segue medrando de forma progresiva no calendario cultural compostelán.
