O artista compostelán Mondra será un dos protagonistas das vindeiras Festas da Ascensión cun concerto previsto para o xoves, 14 de maio, na Praza da Quintana, coincidindo co día grande das celebracións. O anuncio foi realizado pola concelleira de Festas, Pilar Lueiro, xunto co propio músico a través das redes sociais.
No vídeo difundido, o cantareiro e bailador amosou a súa satisfacción por actuar nun dos espazos máis emblemáticos da cidade e convidou á cidadanía a participar no evento, sinalando que “será moi especial”. Ademais, avanzou que o espectáculo incluirá sorpresas para o público asistente.
O concerto chega nun momento de actividade destacada para o artista, que acaba de presentar ‘Mazarocas’, o seu novo sinxelo en colaboración con Baiuca. O tema publícase no marco dunha xira estatal iniciada o pasado 14 de marzo en Bilbao e que inclúe actuacións en cidades como Madrid, Barcelona, León, Zamora ou Uviéu, combinadas con concertos en Galicia.
TRAXECTORIA CONSOLIDADA
Mondra consolidouse nos últimos anos como unha das figuras destacadas da música galega actual. O seu primeiro álbum, ‘ARDĒN’ (2023), acadou recoñecemento tanto do público como da crítica e foi distinguido co Premio Martín Códax ao Mellor Álbum de Electrónica 2024, ademais do Premio Mestre Mateo ao Mellor Videoclip 2025 polo tema ‘MARIMONDRA’.
En maio de 2025 publicou o seu segundo traballo, ‘DE RONDA’, un proxecto que se desenvolve tamén no ámbito escénico a través da proposta ‘A RONDA’, baixo a dirección artística do coreógrafo Daniel Rodríguez. A montaxe combina voces, sintetizadores e percusión tradicional cunha proposta visual que incorpora tamén interpretacións de danza.
Nos seus directos, o artista está acompañado por unha banda formada por Artur Puga, Julia Sánchez-Biezma, Xabi Gómez e Saínza Piñeiro, ademais das intérpretes de danza Sabela Domínguez e Jandros Rodríguez.
Ao longo da súa traxectoria recente, Mondra superou o cento de concertos en diferentes escenarios, tanto en Galicia como fóra dela, cunha proposta que mestura tradición e contemporaneidade e que terá na Quintana unha nova cita destacada dentro das festas máis sinaladas de Compostela.
