O Concello de Santiago aprobou as bases da XIX edición do Premio Internacional ‘Compostela’ para Álbums Ilustrados, un certame consolidado no ámbito editorial que abre agora un novo prazo de participación. A convocatoria activarase tras a súa publicación no Boletín Oficial da Provincia da Coruña e permanecerá aberta ata o 15 de maio de 2026, mentres que o fallo do xurado está previsto para a última quincena de xuño.
O galardón está dirixido a autores e ilustradores de calquera nacionalidade, que poderán presentar obras orixinais e inéditas escritas en calquera das linguas oficiais da Península Ibérica. Entre os requisitos, establécese o envío de cinco copias do texto, tres ilustracións orixinais e as súas correspondentes reproducións en cor, ademais dunha maqueta completa do proxecto.
As propostas deberán contar cun máximo de 40 páxinas interiores e poderán empregar calquera formato, tamaño ou técnica. A documentación deberá entregarse baixo lema ou pseudónimo no Rexistro Xeral do Concello de Santiago, nun procedemento que garante o anonimato das persoas participantes.
Desde a súa creación, o premio acumulou unha ampla participación, con 4.914 traballos rexistrados en edicións anteriores, procedentes de países de Europa, América e Asia. Esta cifra reflicte a dimensión internacional dunha convocatoria que se converteu nun referente no ámbito dos álbums ilustrados.
Ao longo das súas edicións, o certame recoñeceu proxectos de autoras e autores de diferentes procedencias. A primeira gañadora foi a arxentina Natalia Colombo con ‘Cerca’, mentres que na última edición resultaron premiadas Arianna Squilloni e Raquel Catalina polo álbum Grande e pequena.
LIGAZÓN COA PROMOCIÓN DA LECTURA
Precisamente esta obra foi o eixo da recente XX Campaña Municipal de Animación á Lectura, recuperada polo Concello tras a interrupción provocada pola pandemia. A programación, desenvolvida entre o 9 de febreiro e o 12 de marzo, incluíu contacontos, visitas guiadas, obradoiros e sesións formativas.
No conxunto das actividades participaron 2.261 escolares e 110 docentes de 28 centros educativos composteláns, nunha iniciativa que tamén incorporou outros títulos premiados nas últimas edicións do certame.
