A Fundación Eugenio Granell converterase desde o 26 de febreiro nun escaparate da creación artística emerxente coa apertura da exposición ‘Despunte’26’, unha proposta que reúne os proxectos finais do alumnado da Escola de Arte e Superior de Deseño Mestre Mateo (EASD Mestre Mateo) de Santiago de Compostela.
A inauguración terá lugar ás 18:00 e a mostra poderá visitarse ata o 15 de marzo, de martes a venres en horario de 11:00 a 14:00 e de 16:00 a 20:00, e os sábados de 10:30 a 14:30. A iniciativa ofrece un percorrido por distintas disciplinas creativas que abranguen desde a escultura en metal e mármore ata a xoiería conceptual, pasando por proxectos fotográficos de enfoque crítico e propostas de deseño de produto centradas na experiencia da persoa usuaria.
A exposición reúne un total de 20 proxectos procedentes das especialidades de Deseño de Produto, Técnicas Escultóricas, Xoiaría Artística e Fotografía, configurando unha panorámica da produción contemporánea do alumnado do centro compostelán. As obras abordan cuestións vinculadas á identidade, á memoria, ao territorio, á sustentabilidade ou á innovación social, establecendo un diálogo entre tradición e linguaxes actuais.
Segundo explicou Elisa González Penas, vicedirectora da EASD Mestre Mateo, “esta exposición funciona como a antesala técnica e artística imprescindible para entender a dimensión do traballo realizado nas aulas”, ao tempo que agradeceu a colaboración da Fundación Granell para facer posible a mostra nun espazo expositivo de referencia na cidade.
Pola súa banda, Araceli Díaz Cabanas, profesora de Deseño de Produto e coordinadora da exposición, sinalou que “a organización da exposición Despunte supuxo un reto tan esixente como enriquecedor”. A responsable lembrou que o proxecto expositivo xurdiu hai dous anos coa finalidade de ampliar o formato inicial da pasarela de moda e dar visibilidade ás demais especialidades do centro a través dunha selección estruturada en catro ámbitos creativos.
Díaz Cabanas subliñou que o proceso de comisariado implicou unha análise detallada das candidaturas, atendendo tanto á calidade técnica como á capacidade das propostas para dialogar co espazo e entre si. “Procurouse construír un relato plural que amosase a diversidade de linguaxes, materiais e enfoques presentes na creación contemporánea galega”, indicou. Tamén destacou a importancia da coordinación entre departamentos na organización da mostra, un traballo conxunto que favoreceu a aprendizaxe compartida entre o profesorado das distintas áreas.
A exposición forma parte dun proxecto máis amplo que culminará o 5 de marzo coa celebración da Gala Despunte, na que se presentarán as coleccións do alumnado do Grao en Deseño de Moda e se entregarán os premios correspondentes aos proxectos finais. Durante o acto de apertura da mostra daranse a coñecer os traballos que optan aos Premios Despunte e presentarase o cartaz oficial da gala.
Elisa González Penas lembrou que o proxecto Despunte naceu en 2009 como pasarela vinculada ao Grao en Deseño de Moda e que, tras a súa consolidación, ampliouse hai dous anos cun formato expositivo específico para o resto das especialidades. “Hoxe, Despunte fúndese nunha experiencia única onde a exposición, o desfile e a gala se complementan e se retroalimentan”, afirmou, sinalando que esta fórmula permite proxectar de maneira conxunta o traballo do alumnado dos estudos superiores e dos ciclos formativos.
