A Xunta de Galicia iniciou no Centro Dramático Galego os ensaios de Hamlet, a nova produción propia da unidade teatral da Consellería de Cultura, Lingua e Xuventude para este ano. A montaxe, dirixida escenicamente por Tito Asorey, estrearase o vindeiro 19 de marzo no Salón Teatro.
O proxecto propón unha versión galega do clásico de William Shakespeare, asinada polo propio Asorey xunto a Vanesa Sotelo. Trátase dunha montaxe de gran formato que se integra na liña programática do CDG de incorporar ao galego títulos fundamentais da dramaturxia universal. Hamlet, publicado en 1603, é unha das obras máis representadas e traducidas da historia do teatro.
O actor vigués Alejandro Jato encarna o papel principal nesta produción, acompañado por un elenco formado por Sergio Abelaira, Cristina Andrade, Belén Constenla, Raquel Espada, Isabel Garrido, César Goldi, Marita Martínez, Iolanda Muíños, Anxo Outumuro, Pedro Placer, Adrián Ríos, Machi Salgado, Toni Salgado, Inés Salvado Gontad e Sergio Zearreta. A selección do reparto realizouse mediante un proceso de audicións ao que se presentaron máis de 300 profesionais.
No equipo artístico figuran tamén Carlos Alonso na escenografía, Laura Iturralde na iluminación, Saturna no vestiario, Xavier Bértolo no espazo sonoro, Lorena Calvo na maquillaxe e caracterización, Rut Balbís no movemento escénico e coreografía, Xosé Piñeiro na loita escénica, Melania Cruz na asistencia de texto, Rosa Moledo no asesoramento lingüístico e Sara Rey como axudante de dirección.
As funcións de Hamlet desenvolveranse de mércores a domingo ata o 3 de maio. A venda anticipada de localidades xa está dispoñible na web entradas.ataquilla.com e no despacho de billetes do Salón Teatro nos días de apertura.
De maneira paralela aos ensaios, o Centro Dramático Galego mantén en cartel e en xira Memorias dun neno labrego, espectáculo dirixido por Cándido Pazó a partir da obra de Xosé Neira Vilas. A produción, estreada o pasado 8 de xaneiro, poderá verse de novo no Salón Teatro do 11 ao 15 de febreiro e visitará, nunha primeira distribución, Vimianzo (30 de xaneiro), Nigrán (1 de febreiro), Lugo (5 de febreiro), Ribeira (6 de febreiro), Vilalba (7 de febreiro), Rianxo (18 de febreiro), Monforte de Lemos (19 de febreiro), O Barco de Valdeorras (20 de febreiro) e Carballo (21 de febreiro).
