A ofrenda musical do ‘Ano Castelao’ celebrouse este sábado no Panteón de Galegas e Galegos Ilustres, nun acto organizado pola ‘Fundación Castelao’ que reuniu representación institucional e do ámbito cultural galego. A cita tivo como eixo central un recital de violín e piano a cargo do violinista Anxo Gómez Piñeiro e da pianista Haruna Takebe.
O concerto desenvolveuse nun espazo de forte carga simbólica para a memoria colectiva de Galicia, no marco das actividades conmemorativas dedicadas á figura de Daniel Castelao, autor fundamental da cultura galega contemporánea. A proposta musical quixo servir como xesto de lembranza e recoñecemento ao seu legado intelectual e artístico.
Ao acto asistiu a alcaldesa de Santiago, Goretti Sanmartín Rei, xunto con membros da corporación municipal. Na súa intervención, a rexedora puxo o acento na importancia do esforzo colectivo para manter viva a presenza de Castelao, sinalando que “hai que agradecer o esforzo do conxunto do pobo galego para que Castelao teña presenza”. Sanmartín lembrou tamén que o Concello de Santiago culminou este ano unha reivindicación histórica coa denominación da estación Intermodal como Daniel Castelao, e afirmou que desde a institución municipal “continuaremos sempre loitando pola memoria histórica”.
