O Concello de Santiago de Compostela e Alvarellos Editora celebran este sábado 27 de decembro un acto de homenaxe a Federico García Lorca e a Ánxel Casal no baixo do número 15 da rúa do Vilar, espazo no que hai noventa anos se imprimiu o libro Seis poemas galegos. O local, que foi sede da histórica Editorial Nós, abre de maneira excepcional para acoller esta conmemoración de marcado carácter simbólico.
A iniciativa pon o foco no valor histórico e cultural dunha obra singular, ao tratarse do único libro que García Lorca escribiu nunha lingua distinta ao castelán. A publicación foi posible grazas á súa relación coa cultura galega e ao labor editorial de Ánxel Casal, figura central do galeguismo cultural da época. A data do acto non é casual, xa que coincide exactamente co 27 de Nadal de 1935, día no que, segundo recolle o colofón da edición orixinal, rematou a impresión do volume.
A homenaxe está presidida pola alcaldesa de Santiago, Goretti Sanmartín, e inclúe unha actuación musical de Uxía, así como a intervención do editor e escritor Henrique Alvarellos. O acto desenvólvese nun espazo vencellado á historia editorial e intelectual de Galicia, reforzando o papel de Compostela como lugar de encontro creativo e de diálogo cultural.
Durante a súa intervención, a alcaldesa destacou que Seis poemas galegos “é un dos máis valiosos exemplos do que podemos chamar inmersión cultural, porque nos amosa a capacidade dun poeta para mergullarse nunha cultura para el allea ata facela propia a través da creación, desde o respecto, o coñecemento e o afecto”. Sanmartín subliñou tamén que a obra “dá conta dun labor colaborativo entre García Lorca e os seus amigos galegos, como Ánxel Casal, a prol da permeabilidade non só entre idiomas, senón tamén entre identidades culturais”.
