A concelleira de Festas, Pilar Lueiro, presentou este venres os detalles da cabalgata de Reis que percorrerá a cidade de Santiago na tarde do 5 de xaneiro, cun dispositivo no que participarán arredor de 300 persoas e que contará con cinco carrozas. Segundo explicou, as súas Maxestades de Oriente levan semanas en contacto co Concello para ultimar unha chegada que manterá elementos xa consolidados e incorporará novidades pensadas para mellorar a experiencia e a seguridade.
A edición deste ano xirará arredor de dous eixos simbólicos: a boa estrela, que volverá abrir o desfile, e as danzas de reis, un elemento tradicional da cultura galega que se integra como motivo central da cabalgata de 2026. A concelleira indicou que esta combinación responde ao interese dos Reis Magos por manter sinais recoñecibles do Nadal compostelán e, ao tempo, introducir contidos vinculados á tradición.
No que respecta á participación infantil, Lueiro confirmou que o prazo de inscrición xa está pechado e que os sorteos permitiron configurar unha comitiva na que nenos e nenas da cidade acompañarán aos Reis durante todo o percorrido. En total, o desfile estará composto pola carroza da boa estrela, a carroza real e as tres carrozas correspondentes a Melchor, Gaspar e Baltasar.
Entre as novidades técnicas, o Concello solicitou aos talleres encargados das carrozas que incorporen cubertas protectoras, co obxectivo de evitar as incidencias provocadas pola choiva na edición anterior. Xunto ás carrozas desfilarán propostas de música, danza, acrobacias e cor, cun equipo formado por 60 artistas profesionais, 36 heraldos e 12 paxes, ademais da colaboración de colectivos da cidade como a Asociación Ruliña, a Escola de Danza Mandala e a Asociación Trella.
Durante o percorrido repartiranse 1.500 quilos de caramelos, todos eles sen glute e, como novidade, brandos. Por razóns de seguridade, a distribución realizarase unicamente dende as carrozas.
A xornada comezará pola mañá coa chegada dos Reis Magos ao aeroporto Rosalía de Castro, dende onde se desprazarán ao Espazo Cultural Rosalía de Castro para recibir á rapazada ás 12:00 e recoller as últimas cartas. Pola tarde, a comitiva iniciarase na Praza da Mercé arredor das 17:15, para comezar o desfile ás 17:30 cara á Praza do Obradoiro.
O itinerario incluirá a Avenida de Ferrol, Romero Donallo, Frei Rosendo Salvado, Praza Roxa, República do Salvador, rúa do Hórreo, Praza de Galicia, Porta Faxeira e rúa do Vilar, ata a chegada ao Obradoiro, onde está prevista a recepción institucional ás 19:00 no Pazo de Raxoi.
A organización habilitará un tramo sen son na Avenida de Ferrol, entre os cruces de José Ángel Valente e Doutor Maceira, así como un espazo adaptado para cadeiras de rodas no inicio da mesma avenida. Para facer máis levadeira a espera da recepción oficial, o Concello programou un concerto de Gramola Gominola e a tradicional chocolatada na Praza do Obradoiro.
Durante estas semanas tamén permanecen activas diversas caixas de correo reais en equipamentos municipais, centros socioculturais e centros educativos, co obxectivo de facilitar que a infancia compostelá poida facer chegar as súas cartas aos Reis Magos. A concelleira avanzou que a cabalgata gardará “algunha sorpresa” que se desvelará o propio día do desfile.
