O conselleiro de Cultura, Lingua e Xuventude, José López Campos, salientou este martes o papel do Consorcio de Santiago no reforzo da dinamización cultural de Santiago de Compostela de cara a 2026. Fíxoo tras participar na reunión do Consello de Administración do organismo, na que se aprobaron o plan de obxectivos e diversas medidas e accións previstas para o vindeiro exercicio.
Durante a súa intervención, o representante do Goberno galego puxo en valor o conxunto de actividades e proxectos culturais impulsados ao longo de 2025 baixo a coordinación do Consorcio. Neste contexto, amosouse convencido de que o traballo desenvolvido permitirá avanzar na consolidación e posta en marcha de novas iniciativas culturais.
Segundo indicou, estas actuacións estarán aliñadas coa proxección da capital galega e coa preparación do Xacobeo 2027, ao que se referiu como un reto de grande relevancia para a cidade e para o conxunto da comunidade autónoma.
