A Universidade de Santiago de Compostela abrirá a comezos do mes de xaneiro o prazo de matrícula para os cursos de idiomas correspondentes ao segundo semestre do ano académico 2025-2026, unha oferta formativa que inclúe diferentes linguas e modalidades tanto no campus de Santiago como no de Lugo. Nalgúns casos, o acceso aos cursos estará condicionado á realización dun test de nivel previo.
No campus de Santiago, o Centro de Linguas Modernas (CLM) impartirá cursos de inglés, alemán, catalán, francés, italiano, portugués e galego para persoas non galegofalantes. Pola súa banda, no campus de Lugo a programación do segundo semestre inclúe formación en alemán, francés, galego e inglés, con distintas opcións segundo o nivel e o tipo de curso.
A oferta está dirixida prioritariamente ao persoal e ao estudantado da USC, aínda que tamén está aberta a calquera persoa maior de 18 anos interesada, mesmo se non pertence á comunidade universitaria. Esta apertura busca ampliar o acceso á aprendizaxe de linguas máis alá do ámbito estritamente académico.
En relación cos requisitos de acceso, non será necesario realizar un test de nivel previo no caso do alumnado que se matricule no nivel inicial dun idioma nin para aquelas persoas que poidan acreditar ter superado o nivel inmediatamente anterior do Marco Europeo Común de Referencia para as Linguas (MECRL) no ano ou semestre anterior dentro do propio CLM. Quen dispoña dunha acreditación externa deberá contactar previamente co Centro a través do enderezo clm@usc.gal para avaliar a súa situación.
Nos demais supostos, será obrigatoria a realización dun test de nivel previo á matrícula, que poderá desenvolverse de maneira presencial e/ou en liña. Para poder facelo, as persoas interesadas deberán inscribirse de balde dentro dos prazos establecidos para cada idioma e modalidade, recollidos no anexo da convocatoria oficial.
Ademais dos cursos regulares, a USC vén de convocar tamén unha nova edición das Conversas en linguas modernas para o segundo semestre do curso 2025-2026. Esta iniciativa inclúe actividades en francés, inglés e checo, nos niveis intermedio e avanzado, e mantén uns requisitos de acceso moi semellantes aos dos cursos ordinarios. Neste caso, tanto o prazo de matrícula como o de inscrición no test de nivel comezarán no mes de febreiro.
Toda a información detallada sobre a oferta, os prazos e os procedementos de inscrición poderá consultarse a través das canles oficiais da USC e no Centro de Linguas Modernas.
