A Xunta de Goberno Local aprobou a designación de David Fiuza Souto como novo director da Banda Municipal de Santiago, posto que asumirá en réxime de relación laboral especial de alta dirección. A decisión chega tras o proceso convocado polo Concello, no que se avaliaron criterios de idoneidade, competencia e experiencia profesional, especialmente vinculados á dirección de bandas e ao coñecemento da administración local.
Fiuza acumula unha ampla bagaxe na dirección musical a nivel institucional. Entre 2021 e 2024 exerceu como director titular da Banda Municipal de Santiago, tamén baixo un contrato de alta dirección, ao tempo que desenvolveu funcións semellantes no Concello de Lugo, onde ocupou o posto de director titular da súa banda municipal como funcionario do subgrupo A1. O acordo municipal destaca esta traxectoria en administracións locais como un dos elementos de maior peso na resolución.
O músico de Vila de Cruces ten dirixido, ademais, numerosas formacións fóra do ámbito municipal, desde a Banda Unión Musical de Meaño, a Mallorca Saxophone Ensemble ou a banda sinfónica do CIM ‘La Armónica’ de Buñol, ata agrupacións galegas como a da Federación Galega de Bandas, a Banda Artística de Merza ou a Banda de Lalín. A isto súmanse cargos actuais en agrupacións como a Gran Canaria Wind Orchestra (dende 2017), a Banda Sinfónica Galega (desde 2022), o Ensemble Galego de Saxofóns e o Arundo Donax Ensemble.
O seu perfil compleméntase cun longo historial como director convidado, no que destaca a colaboración coa Banda Municipal da Coruña, con arredor de 40 concertos realizados, así como direccións en orquestras e grupos de cámara.
No plano académico, Fiuza conta con titulación superior en Dirección, en Clarinete e no grao “Bachelor” de dirección de banda, xunto con máis de 700 horas de formación específica en materias relacionadas coa dirección orquestral e de banda. Tamén desenvolveu tarefas docentes, entre elas a de profesor titular da Escola Galega de Dirección de Banda.
Segundo recollen as bases da convocatoria, a resolución tivo en conta competencias directivas, formación específica e experiencia profesional acreditada no ámbito das bandas municipais. Ao dispor do currículo “máis idóneo” entre as candidaturas presentadas, o executivo local acordou finalmente a súa designación para retomar a dirección da agrupación compostelá.
