O Concello de Santiago presentou este martes unha nova iniciativa dedicada a rescatar a figura de Concha Castroviejo, escritora, xornalista e crítica literaria compostelá falecida hai 30 anos. A alcaldesa, Goretti Sanmartín, explicou que o obxectivo é difundir a traxectoria dunha autora “atrevida e adiantada ao seu tempo”, cuxa vida e obra continúan a ser pouco coñecidas mesmo dentro da cidade.
A actividade, impulsada pola área de Igualdade e desenvolvida pola cooperativa MAUS, estrutúrase en tres paseos literarios que permitirán percorrer lugares vinculados á biografía de Castroviejo. As sesións celebraranse o mércores 10 e o venres 12 ás 18:30, e o sábado 13 ás 12:00, con 30 prazas por quenda e inscrición previa. Son propostas de balde e pensadas para público adulto.
Sanmartín salientou que Castroviejo, autora de novelas como Los que se fueron ou Víspera del odio, “rompeu prexuízos”, desenvolveu unha carreira independente e mantivo un posicionamento firme a favor da legalidade republicana e en contra do golpe franquista, feito que marcou parte da súa vida e o seu exilio. A rexedora lembrou tamén a súa relevancia como pioneira no xornalismo compostelán e na crítica literaria estatal.
A cooperativa MAUS, representada por Xiana Iglesias, detallou o contido dos paseos, que tomarán como punto de partida a Praza de Conxo Terrabia e rematarán na Casa Europa, en Vista Alegre. As rutas combinarán contexto biográfico, referencias espazo-temporais e a lectura de fragmentos da autora.
Iglesias definiu a Castroviejo como “unha das grandes escritoras compostelás do século XX”, lembrando que Borobó xa a situaba como referente literaria dunha xeración. Subliñou o seu papel como primeira muller da cidade que asinou crónicas xornalísticas, a súa defensa do divorcio e a súa capacidade para narrar experiencias extremas como o exilio. A traxectoria da autora desenvolveuse entre Santiago, Francia, México e Madrid, onde concluíu a súa carreira profesional.
Nos paseos participará a xornalista compostelá Marga Tojo, quen lerá textos de Castroviejo e outros escritos para a ocasión, e tamén intervirá, na sesión do día 10, Nina Santos, sobriña da autora e figura clave para acceder á documentación familiar empregada na investigación.
ACTIVIDADES PARA A MODALIDADE E MATERIAIS DIVULGATIVOS
Ademais dos itinerarios literarios, MAUS preparou unha xincana sobre a vida de Castroviejo, baseada no libro El jardín de las siete puertas e pensada para rapazada de 12 a 16 anos, cunha versión presencial na zona vella e outra en formato online, accesibles a través da web do CIM.
As persoas interesadas en participar nas rutas deberán inscribirse no formulario dispoñible en www.i.gal/concha. O Concello difundirá tamén uns folletos elaborados polo CIM de Santiago, nos que se recolle unha cronoloxía da vida da autora, marcada polo exilio republicano e a súa intensa actividade xornalística.
