A pasada noite, o Auditorio de Galicia encheuse con máis de 900 persoas para celebrar o décimo aniversario de aRi[t]mar Galiza Portugal, un proxecto impulsado pola Escola Oficial de Idiomas de Santiago que desde 2015 promove os vínculos culturais entre Galicia e o mundo lusófono.
Segundo o seu director e fundador, Gonzalo Constenla, “aRi[t]mar Galiza Portugal é unha festa compartilhada”, unha cita que ano tras ano converte Compostela nun punto de encontro para artistas e público de ambas beiras do Miño.
O escenario acolleu as actuacións de Mondra, recoñecida coa Mellor Canción Galega por ‘Quererse ben’; Diogo Piçarra, premiado pola Mellor Canción Portuguesa; Elba Pedrosa, gañadora da Mellor Poesía Galega; e Cátia Cardoso, distinguida pola Mellor Poesía Portuguesa. A cidade de Braga participou como convidada nesta edición, representada pola concelleira Carla Sepúlveda.
Durante a súa intervención, Mondra lembrou o momento no que compuxo o tema galardoado: “Quería escribir unha canción de amor para min e para o mundo, que moita falta lle fai. Que viva o amor”. Pola súa parte, Elba Pedrosaprotagonizou un dos instantes máis emotivos da noite ao estrear unha peza inédita acompañada polo rapeiro compostelano Big Meu e o músico Xosé Liz.
Na entrega dos galardóns participaron a alcaldesa de Santiago, Goretti Sanmartín; o secretario xeral da Lingua, Valentín García; o cónsul xeral de Portugal en Galicia, João Bezerra; a responsable do Instituto Camões – Centro Cultural Português en Vigo, Célia Guido; e Isabelle Kerdudo, coordinadora do equipo de dinamización da lingua na EOI. A gala, conducida por Xurxo Souto e Tati Moyano, combinou música, poesía e humor nun ambiente de celebración compartida.
O aniversario serviu tamén para presentar o libro ‘Dez anos de música e poesía galego-portuguesa’, unha publicación que recolle testemuños, biografías dos artistas premiados e un percorrido polas distintas edicións do proxecto. “É o mellor da última década nunha compilación que reflicte a forza cultural e emocional desta ponte entre Galicia e Portugal”, sinalou Constenla.
