O Claustro Alto do Colexio de Fonseca acolle desde este venres a exposición ‘As primeiras profesoras da Universidad Complutense de Madrid’, unha mostra que busca visibilizar ás mulleres pioneiras na docencia e na investigación universitaria en España. Entre elas figuran as galegas Emilia Pardo Bazán, Antonia Ferrín Moreiras e Jimena Fernández de la Vega, tres figuras que, ademais de pasar polas aulas da Universidade de Santiago de Compostela, deixaron unha pegada decisiva na historia académica do país.
A exposición forma parte do proxecto ‘Académicas UCM’, impulsado pola Universidade Complutense de Madrid co obxectivo de recuperar a memoria das primeiras mulleres docentes e investigadoras que traballaron na institución, entón denominada Universidade Central. A través de paneis, fotografías e documentos, o proxecto reconstrúe un século de avances e dificultades no acceso das mulleres ao ensino superior.
O acto inaugural celebrouse o venres 17 e estivo presidido pola vicerreitora de Estudantes e Cultura da USC, Pilar Murias, acompañada pola delegada do reitor para a Igualdade, Sonia E. Rodríguez, e pola súa homóloga na UCM, Isabel Tajahuerce. Tamén participaron Eva López, presidenta de Alumni USC, e Violeta Izquierdo, comisaria da mostra en Madrid. As representantes das dúas universidades coincidiron en destacar o valor simbólico da chegada da exposición a Santiago, a primeira cidade fóra de Madrid que acolle este proxecto, e manifestaron o desexo de que a USC asuma o relevo e impulse unha iniciativa semellante sobre as súas propias profesoras pioneiras.
A exposición lembra o Real Decreto do 8 de marzo de 1910, que permitiu por primeira vez o acceso das mulleres aos estudos universitarios en España. Con todo, as primeiras alumnas e profesoras tiveron que enfrontarse a censuras, prexuízos e obstáculos para poder exercer a súa carreira académica e profesional.
As historias das protagonistas —que abranguen desde o comezo do século XX ata a actualidade— reflicten o esforzo, a preparación e o compromiso dunha xeración que abriu camiños para as que chegarían despois. O percorrido pola mostra permite coñecer as súas traxectorias e entender o longo proceso de equiparación en dereitos e oportunidades que aínda hoxe continúa.
A exposición permanecerá aberta ao público ata o 28 de novembro de 2025, en horario de luns a venres, de 11:00 a 14:00 e de 17:00 a 20:30 horas, no histórico edificio de Fonseca.
