O proxecto ‘Sitios’, impulsado por Barraca XXI, busca diluir a fronteira entre o Hospital Psiquiátrico de Conxo e a veciñanza a través da arte e a creación audiovisual. A iniciativa, que conta coa colaboración do centro sociocultural do barrio, pretende achegar á cidadanía procesos de creación inclusivos, nos que participan usuarios e usuarias do hospital e o público xeral.
A programación dará comezo o martes 30 de setembro ás 18:00 no CSC Aurelio Aguirre, cunha sesión de curtametraxes das autoras Alicia Úbeda, Diana López e Lucía Estévez. Tras a proxección, terá lugar unha conversa moderada por Rosa Castro na que tamén intervirán as terapeutas ocupacionais María Pais e Estefanía Castiñeira.
As dúas seguintes citas celebraranse no Hospital Psiquiátrico de Conxo, tamén con acceso libre. O mércores 1 de outubro, proxectarase O corno, filme da directora Jaione Camborda, quen participará nun coloquio aberto xunto á presentadora e autora Marta Doviro. Finalmente, o xoves 2 de outubro, tras a exhibición de Jacinto, terá lugar un diálogo entre o seu director, Javi Camino, o psiquiatra Ramón Area e a cineasta Ángeles Huerta.
Segundo explica a organización, as obras seleccionadas exploran fraxilidades vinculadas á saúde mental e aos estereotipos sociais, co obxectivo de fomentar a reflexión colectiva e ofrecer un espazo de encontro entre comunidade, pacientes e profesionais.
