O Festival C incorpora nesta edición unha nova proposta escénica centrada na tradición oral galega en feminino. O ciclo, titulado Por que non cantades todas?, desenvolverase durante tres mércores consecutivos —os días 6, 13 e 20 de agosto— no paseo da Ferradura da Alameda de Santiago, a partir das 20:00. A iniciativa está organizada polo Concello de Santiago, a través de Compostela Cultura, e conta co apoio da Deputación da Coruña, así como coa colaboración de programas como Apego ou Danza a Escena do INAEM.
O ciclo toma como inspiración unha das coplas recollidas por Dorothé Schubarth e Antón Santamarina no Cancioneiro Popular Galego, cantada por unha muller chamada Esclavitud: “Por qué non cantades nenas / por qué non cantades todas…”. Esta pregunta, formulada en forma de verso tradicional, serve como punto de partida para unha proposta que reivindica o papel das mulleres como transmisoras da cultura popular, visibilizando a súa contribución á construción da identidade galega.
A primeira sesión ten lugar este mércores 6, co grupo Ultreia. As súas integrantes presentan un repertorio que incide no protagonismo feminino na música tradicional e nos estereotipos de xénero asociados aos instrumentos, combinando pandeiretas, gaitas, acordeóns e outras ferramentas sonoras nunha proposta que mestura tradición e reflexión crítica.
O mércores 13, será a quenda de Brincadeira, colectivo que afonda na memoria das mulleres do rural galego. Os seus cantos evocan o traballo no campo, as festas populares e os saberes transmitidos oralmente polas avoas. A súa actuación está concibida como un acto de resistencia cultural ante décadas de invisibilización das achegas femininas ao patrimonio inmaterial.
O ciclo rematará o día 20 coa participación de Cantigas e Agarimos, que ofrecerán un percorrido musical pola xeografía galega a través de pezas recompiladas en diferentes comarcas. Acompañadas de instrumentos tradicionais populares —pandeiros cadrados e redondos, latas, cunchas—, as cantareiras apostan pola celebración colectiva e a responsabilidade interxeracional de manter vivo este legado.
As tres sesións desenvolveranse no espazo simbólico da Ferradura da Alameda, onde dialogan as esculturas de Federico García Lorca e Rosalía de Castro, e contarán con entrada libre. A iniciativa súmase ás propostas do Festival C que buscan poñer en valor a cultura galega desde unha perspectiva contemporánea e integradora, e supón tamén unha chamada á reflexión sobre o papel das mulleres na preservación da memoria colectiva a través da música e a palabra.
