O claustro da Hospedaría de San Martín Pinario, no corazón de Santiago de Compostela, converteuse entre o 17 e o 19 de xullo nun espazo de encontro para o sector queixeiro galego coa celebración do ‘Cheese Market Tour’, un evento que combinou promoción gastronómica, formación profesional e experiencias abertas ao público.
A iniciativa, impulsada pola Asociación QdeQuesos co apoio da Organización Interprofesional Láctea (INLAC), tivo como obxectivo poñer en valor a calidade e diversidade do queixo producido en Galicia, ao tempo que buscou reforzar o seu vínculo co territorio, achegar os consumidores á orixe dos produtos e impulsar o desenvolvemento rural.
A xornada profesional desenvolvida o xoves 17 reuniu a representantes de queixerías, administracións públicas, universidades, supermercados, entidades bancarias e asociacións do ámbito turístico, que analizaron os principais desafíos do sector nun total de cinco mesas de debate. Entre os temas abordados destacaron a comercialización, o etiquetado, a innovación tecnolóxica, a sustentabilidade do rural e o potencial do queixo como reclamo turístico.
A primeira mesa centrouse na visibilidade e puntos de venda do queixo galego, coa intervención de Ramón García Seara (‘ATHC’), Diego Pérez Mira (‘ASUGA-GADISA’), Maikel Fernández (‘Queixería Prestes’) e o hostaleiro Pati Blanco (‘Academia Galega de Gastronomía’).
No eido técnico, tomaron a palabra Lidia Ferreras (LARBUS), Laura Abuín (APLTA-USC) e Paulino Alonso (Saúde Pública de Santiago), que analizaron cuestións sanitarias, de etiquetado e I+D. A terceira mesa puxo o foco no desenvolvemento rural, coa participación de Silvestre Balseiros (Xunta), Roberto Alonso (CLUSAGA) e Jesús Combarro (ABANCA AGRO).
As denominacións de orixe protexidas tamén estiveron representadas polos seus responsables: Luis Lamas (DOP Arzúa-Ulloa), Daniel Pérez (DOP San Simón da Costa) e Carmela Cano (Queixería Galmesán), moderados por Nuria Arribas (INLAC). A última mesa abordou a dimensión turística do produto lácteo, coa participación de iniciativas como Slowfood Compostela, TROULANDA, Casa do Queixo Grixalba e Galicia Calidade, entidade que pechou o acto institucional.
A programación continuou o venres 18 con catas comentadas abertas ao público, nas que se puideron degustar e coñecer en profundidade os sabores e variedades do queixo galego, tanto con denominación de orixe como sen ela.
O sábado 19 tivo lugar o gran mercado de peche, que reuniu a 12 queixerías e 6 produtores agroalimentarios galegos no mesmo claustro compostelán. As persoas asistentes tiveron ocasión de probar e mercar produtos, participar en obradoiros formativos e vivir unha experiencia gastronómica e patrimonial nun espazo singular da cidade histórica.
Desde a organización destacan a vontade de continuidade deste evento, que pretende consolidarse como unha plataforma estable para a promoción do sector lácteo galego, e como ferramenta para fomentar a economía rural, crear sinerxías entre o mundo agrogandeiro e o turístico, e poñer en valor a identidade do queixo como símbolo do territorio galego.
