A editorial Chan da Pólvora celebrará este sábado 28 de xuño o seu aniversario e o Día do Orgullo Galego cun acto literario na Horta das Chas, situada na Corredoira das Fraguas de Santiago de Compostela. O evento, que dará comezo ás 19:00, servirá de escenario para a presentación de Mapa da estría, o novo poemario de Andrea Nunes Brións, nun encontro conducido pola xornalista e poeta Ana Romaní, e que contará tamén coa participación da cantante e escritora Alba María.
A xornada terá tamén un marcado carácter reivindicativo e conmemorativo, xa que a data coincide coa aprobación en 1936 do primeiro estatuto de autonomía de Galicia e co Día Internacional do Orgullo LGTBI. Nesta liña, Chan da Pólvora mantén o compromiso iniciado en 2016 de sinalar cada 28 de xuño como unha ocasión para reivindicar identidades, pluralidade e memoria. Foi precisamente un 28 de xuño cando a editorial se presentou publicamente coa edición de Querido Eduardo, cartas entre Suárez Picallo e Blanco Amor. Desde entón, esta celebración serviu tamén para lembrar a figuras como García Lorca, Safo, Sor Juana Inés de la Cruz ou Antón Fortes a través da colección Rabo de Egua, dedicada á poesía das identidades.
Mapa da estría constitúe unha nova aposta de Andrea Nunes pola poesía de autoficción e a exploración das identidades disidentes. Nese percorrido poético, a autora ofrece unha viaxe marcada polas experiencias vitais e culturais vividas en territorios como Vietnam, Guinea Bissau, China, India ou México, sempre desde unha perspectiva que combina o desarraigo, a lingua e a resistencia emocional. O libro está dedicado a María Salvado López, unha das impulsoras da editorial e da Horta das Chas, falecida o pasado mes de novembro. As súas cinsas repousan hoxe ao pé dunha oliveira no propio recinto, plantada este mes de xuño.
A homenaxe a María Salvado ocupará tamén un lugar destacado na xornada. Nacida en Budiño, no concello do Pino, e falecida en Compostela en 2024, Salvado foi unha figura clave da renovación pedagóxica galega desde os anos sesenta, inspirada nas propostas de Célestin Freinet. Defensora dunha escola pública e democrática, sempre vinculou a súa traxectoria á loita social e comunitaria, valores que tamén inspiraron a creación da Horta das Chas como espazo “eco-poético”.
