A concelleira de Capital Cultural, Míriam Louzao, xunto á deputada provincial de Cultura, Natividad González, e o presidente de AJA Galiza, Odilo G. Carneiro, presentaron hoxe en rolda de prensa os principais actos que se levarán a cabo en Santiago de Compostela o vindeiro 25 de abril para conmemorar o 50 aniversario da Revolución dos Caraveis.
Míriam Louzao destacou que “Santiago mantén vínculos moi fortes e estreitos co noso país veciño, Portugal, así como co mundo lusófono, a través de numerosas iniciativas, proxectos e redes que nos unen coa sociedade portuguesa”.
Ademais, anunciou que o Concello estará moi involucrado nas “diversas homenaxes a esta revolución pacífica que trouxo de volta a democracia e que agora celebra o seu cincuentenario”.
A concelleira fixo un chamamento á cidadanía para que se una ao canto colectivo de ‘Grândola Vila Morena‘ de Zeca Afonso, que se convertiu no himno da liberdade. Esta actividade terá lugar o vindeiro 25 de abril ás 18:30 na praza da Música en Compostela, fronte ao Auditorio.
Louzao informou que todas as persoas interesadas en participar deben rexistrarse a través dun formulario na páxina web de Compostela Cultura antes do 21 de abril. “Xa temos confirmadas arredor de 700 inscricións”, dixo. As formacións vocais ou musicais que desexen participar poden rexistrarse en grupo indicando o número total de participantes. Os inscritos recibirán un correo electrónico de confirmación xunto con instrucións para a coordinación do evento.
