Santiago converterá os seus escaparates comerciais en espazos expositivos coa posta en marcha da iniciativa ‘O museo máis pequeno da cidade’, unha proposta da Concellería de Centros Socioculturais, en colaboración co departamento de Comercio, e baseada nunha idea da artista Noemí Batllorí.
A proposta busca acercar a arte á vida cotiá, transformando negocios locais en pequenos museos que ofrecerán exposicións gratuítas e sen aglomeracións con obras creadas pola cidadanía compostelá. Os establecementos comerciais participantes exercerán como salas de exposición, reforzando o seu papel como elementos dinamizadores dos barrios, ao tempo que gañan visibilidade e se achegan a nova clientela.
A participación está aberta a toda a veciñanza, que poderá presentar as súas creacións dentro dun formato reducido: unha caixa de 13×13 centímetros, que será facilitada nos propios centros socioculturais da cidade. O prazo para inscribirse remata o 16 de abril, e os traballos deberán entregarse antes do 30 de abril.
As pezas serán exhibidas nos escaparates dos comercios participantes entre o 14 de maio e o 11 de xullo. Unha vez rematada a mostra, as obras serán devoltas ás súas autoras e autores.
Con esta proposta, o Concello aposta por fomentar a creatividade cidadá e dar unha nova vida ao tecido comercial, ao tempo que promove unha forma alternativa e accesible de consumir cultura, poñendo en valor a expresión artística popular e a implicación comunitaria.
Desde a organización, destacan que ‘O museo máis pequeno da cidade’ supón unha oportunidade para que calquera persoa poida expresarse artisticamente, sen importar a súa formación ou idade, ao tempo que comercios e arte local se dan a man para revitalizar o espazo urbano.
