O líder do Partido Popular en Santiago, Borja Verea, presentou onte o espazo ‘CompArte’, unha iniciativa do PP compostelán que nace como lugar de encontro para actividades culturais e sociais. Verea explicou que o obxectivo deste novo proxecto é “xerar debate e crear cidade” a través de propostas culturais como concertos, exposicións, cineclubes e encontros literarios. O espazo está pensado para estar “atento ás inquedanzas e desexos de toda a cidadanía”, engadiu Verea, quen destacou a importancia de escoitar e incluír diferentes voces.
A inauguración de ‘CompArte’ incluíu a primeira sesión do Cineclube político coa proxección do filme ‘Norman, o home que o conseguía todo’, dirixido por Joseph Cedar. A proxección foi presentada polo xornalista Moncho Lemos, que tamén moderou o coloquio posterior. Segundo Verea, esta sesión inaugural contou con 30 asistentes e cualificouna de “boa acollida”, co desexo de que máis persoas se sumen a futuros eventos.
Verea incidiu en que este espazo busca consolidar a presenza do Partido Popular na rúa e fomentar o diálogo directo con veciños e colectivos locais, engadindo que ‘CompArte’ permitirá explorar distintas perspectivas sobre Santiago que, segundo dixo, poden “enriquecer as propostas para mellorar a cidade”.
As actividades en ‘CompArte’ serán gratuítas e abertas a toda a cidadanía e espérase que a plataforma contribúa a fortalecer o diálogo social na capital galega.
