O profesor Joel Varela Rodríguez, da Facultade de Filoloxía da Universidade de Santiago de Compostela, acaba de publicar en USC Editora o libro titulado “Máis aló do Códice Calixtino. Outros textos ao redor de Santiago o Maior ata o século XII”, onde recolle catro textos xacobeos inéditos que preceden ao famoso Códice Calixtino, guía medieval de peregrinacións.
No volume tamén se inclúen textos coñecidos e revisados que permiten profundar no estudo do culto a Santiago desde os seus inicios ata o ano 1200. Estes textos preséntanse tanto na súa versión orixinal como en tradución e van acompañados de comentarios e unha introdución histórico-literaria detallada.
Este proxecto de investigación recibiu apoio da Cátedra Institucional do Camiño de Santiago e das Peregrinacións da USC, a través da V Convocatoria de Axudas á Investigación sobre o Camiño de Santiago e as Peregrinacións-2023, froito da colaboración entre a USC e Turismo de Galicia.
Entre os documentos máis destacados están catro novas versións da Translatio sancti Iacobi, relato da translación de Santiago, datadas na segunda metade do século XI e conservadas en manuscritos fóra da península. Ademais, inclúese a Concordia de Antealtares, unha versión extensa do achado da tumba de Santiago, transcrita agora a partir do documento máis antigo do Arquivo Histórico Universitario da USC.
