A conselleira de Política Social e Igualdade, Fabiola García, visitou este xoves a residencia pública autonómica de Volta do Castro para render homenaxe a Mari Carmen Figueira Mariño, que cumpre cen anos esta semana. A celebración contou coa presenza de familiares, persoal do centro, outros residentes e a propia conselleira, nun acto que recoñece a longa traxectoria de esforzo e traballo de Mari Carmen, usuaria deste centro residencial desde o ano 2022.
Mari Carmen, que naceu o 2 de outubro de 1924 na parroquia de Asados, en Rianxo, tamén pasou unha parte da súa vida emigrada en Francia durante unha década. Ao longo da súa vida formou unha familia, composta por unha filla, dous netos e dous bisnetos.
Este sábado, 5 de outubro, a residencia de Volta do Castro organizará unha celebración especial polo seu 100 aniversario. O evento incluirá unha misa, unha actuación da Coral Castrosúa e un xantar coas súas familias e compañeiros residentes.
