Este domingo celebrouse en Santiago de Compostela unha nova edición da Limpeza Simultánea de Ríos, organizada por Adega e Proxecto Ríos, que mobilizou a decenas de voluntarios para limpar os ríos Sar e Sarela. No total da xornada, foron retirados máis de 300 quilos de residuos, nun esforzo conxunto de concienciación e protección ambiental.
A intervención no río Sarela, realizada por voluntarios de Adega e da Escola Semente, logrou recoller 72 quilos de lixo, onde destacaban toalliñas húmidas, plásticos e incluso restos de mobles. Itziar Díaz, educadora ambiental de Adega, salientou a presenza de residuos altamente contaminantes como as toalliñas, que a xente segue desbotando polos inodoros, o que provoca serios problemas nas infraestruturas de saneamento.
No caso do río Sar, foron 24 persoas, pertencentes á Asociación de Familias AFA Montessori, as que participaron na limpeza, logrando retirar uns 250 quilos de lixo, entre os que se atopaban restos dunha neveira e outros obxectos insólitos como pilas e baterías. Segundo Itziar Díaz, “por desgraza, moita xente segue utilizando os ríos como vertedoiro, o que contribúe a unha grave contaminación”.
A actividade contou tamén coa presenza de Xesús Domínguez, concelleiro de Sustentabilidade Ambiental do Concello de Santiago, quen destacou a importancia de accións coma esta, especialmente antes de que chegue a tempada de choivas. No caso do Sarela, os voluntarios lograron retirar moitos paus acumulados nas pontes inundables, pero algúns restos foron trasladados a Parques e Xardíns para a súa retirada definitiva.
A Limpeza Simultánea de Ríos, que xa vai pola súa 17ª edición, está promovida en toda Galicia e conta coa colaboración de máis de 70 entidades en 56 municipios, co apoio de Augas de Galicia, a Deputación da Coruña e a Confederación Hidrográfica Miño-Sil.
