Este mes de setembro arrincan na Cidade da Cultura os catro proxectos seleccionados nas Axudas REGA 2024, promovidas pola Xunta de Galicia dentro do Programa de Residencias Artísticas do Gaiás. Os temas abordados por estas iniciativas abranguen desde a representación do colectivo LGBTI+ ata a problemática do acceso á vivenda, pasando pola escultura téxtil e a transformación de mapas en música.
O director xeral de Cultura, Anxo M. Lorenzo, deu a benvida aos artistas seleccionados, destacando o crecemento destas axudas, que en apenas tres edicións triplicaron o número de propostas presentadas, pasando de 56 a 184.
PROXECTOS EN RESIDENCIAS NO GAIÁS
O primeiro proxecto en iniciar a súa residencia será o de María Barros, coa proposta Téxtil suspendido, na que explorará as posibilidades do moulage, unha técnica de alta costura, para crear figuras escultóricas con tecidos. O resultado final será presentado nun libro-obxecto manuscrito dispoñible tamén en versión dixital.
En outubro comezarán os outros tres proxectos. CA-CO-FLEX, de Isabel Fernández, abordará a problemática da vivenda a través dunha peza escénica na que o cartón será o material central. A obra será desenvolvida por un equipo que inclúe a artesá Julia Marín e varios actores e actrices.
Pola súa parte, os músicos Pablo Seoane e Macarena Montesinos desenvolverán Exercicios sonoros de cartografía inversa, un proxecto que transformará mapas históricos da costa galega en música. Ao remate da súa residencia, compartirán o resultado nun concerto/instalación.
Por último, o artista Sergio Marey propón con Deus te livre unha instalación visual e performativa que reflexiona sobre os lazos culturais entre Galicia e Portugal, facendo especial fincapé nas representacións LGTBI+.
Cada proxecto contará cunha dotación de 8.000 euros e o apoio dos espazos e recursos técnicos da Cidade da Cultura, ademais do acompañamento dunha persoa mentora especializada en cada área artística.
