Un neno de sete anos foi trasladado en estado grave ao Hospital Clínico de Santiago tras caer dende o balcón dun cuarto piso situado na rúa República Arxentina, no Ensanche compostelán. O suceso ocorreu arredor das 11:30 da mañá deste domingo, segundo confirmaron varias fontes.
De inmediato, desprazáronse ata o lugar servizos sanitarios, axentes da Policía Nacional e Policía Local, así como policía xudicial e científica, que están a investigar as circunstancias da caída. Segundo as primeiras hipóteses, trátase dun accidente.
O menor foi ingresado na unidade pediátrica de coidados intensivos do hospital compostelán, onde permanece baixo atención médica.
