A directora de Mercados de Carbono e Mobilidade Limpa da Comisión Europea, Beatriz Yordi, advertiu este martes en Santiago de Compostela que o cambio climático “xa está aquí” e que os fenómenos extremos que antes ocorrían cada 100 anos pasarán a suceder cada oito anos a partir de 2050. Así o afirmou durante a xornada titulada ‘O camiño á neutralidade climática: Reflexións desde Galicia e Europa‘, organizada por Ecobas no Consello da Cultura Galega.
Yordi subliñou a necesidade de políticas climáticas que aborden non só as enerxías renovables, senón tamén áreas como os seguros, riscos e transportes. Tamén destacou a importancia do Pacto Verde, co que a Unión Europea busca alcanzar a neutralidade climática e reducir a dependencia de combustibles fósiles, que custou a Europa 774.000 millóns de euros o ano pasado.
O director adxunto de Ecobas, Xabier Labandeira, sinalou que o obxectivo desta xornada foi ofrecer unha “fotografía completa” sobre a situación climática e urxiu á renovación do uso de combustibles fósiles, unha das principais causas do cambio climático.
