Unha céntrica rúa compostelá. Un universitario camiña cun par de maletas, mentres a súa nai o acompaña cargando unhas caixas. Esa imaxe repítese estes días por toda a cidade, mentres uns 20.000 alumnos regresan ás aulas universitarias. Santiago de Compostela vive, en boa medida, de todos eses estudantes, así como do turismo e da administración autonómica. A chegada de todos eles deixa sempre numerosas tarefas pendentes para o Concello e para a Universidade, dúas administracións destinadas a entenderse e a colaborar para potenciar a propia cidade.
É evidente que, froito da desconexión entre ambas as administracións, a USC é entendida como o sitio onde ir aparcar o coche na zona nova. Non é culpa dos picheleiros, senón da falta de retorno visible, da ausencia dunha xeración de valor engadido. Como podemos, desde a Universidade, queixarnos de que a cidadanía non nos ve como parte fundamental da cidade se non lle achegamos, directamente, beneficios? E, ao tempo, como poden desde o goberno local falar da USC como un ente alleo, laiándose da falta de retorno, se as pontes están voadas, o Campus Sur cae a anacos pola falta de cumprimento municipal dun convenio etc.?
Nestes días, o voceiro do Partido Popular, Borja Verea, propuxo entre outras cuestións o impulso de Santiago de Compostela para postularse como Capital Europea da Xuventude, igual que suxeriu un impulso á capital de Galicia como referente internacional, vertebrando ao redor do eixe Ferrol-Lisboa. Estas propostas son, ademais, unha oportunidade excepcional para, precisamente, tender esas pontes tan deterioradas entre a USC e os gobernos de Bugallo e Sanmartín. O feito de contar cunha cantidade de estudantado tan relevante nunha cidade de 100.000 habitantes, captadora ademais de Erasmus, pode e debe contribuír no artellamento deses proxectos para a xuventude. Igualmente, a expansión internacional de Santiago ten na investigación que se realiza na Universidade un piar fundamental de cara a aumentar os beneficios sociais e, tamén, ligar o coñecemento que se xera a un beneficio para as empresas da cidade e a súa área.
Xa que logo, é hora de que desde o goberno local de BNG e CA, así como desde a USC, se dean os pasos necesarios para que iniciemos este camiño xuntos. Non caben aquí escusas ou o habitual desleixo municipal, pois estamos ante unha oportunidade de ouro para reforzar tanto a cidade como a Universidade. Cómpre que sexamos referencia e poñamos as primeiras pedras neste proxecto colectivo. Compostela e os seus habitantes non poden perder este tren.
