O Concello de Ames, a través da Aula da Natureza, organiza a Noite de Estrelas como parte da súa programación estival. A actividade, que busca ofrecer unha experiencia de observación astronómica, terá lugar nos principais núcleos urbanos do concello durante os días 16 e 17 de agosto.
O venres 16 de agosto, a xornada celebrarase no anfiteatro fronte á igrexa do Milladoiro, mentres que o sábado 17 de agosto a actividade desenvolverase no paseo fluvial de Bertamiráns. Ambas as sesións comezarán ás 21:30 horas e finalizarán ás 00:00 horas.
Durante estas xornadas, os participantes, guiados polo astrónomo Antón Bouzas, terán a oportunidade de explorar o ceo nocturno e coñecer detalles sobre a lúa, as galaxias, as constelacións e planetas como Venus, Saturno e Xúpiter. Ademais, descubrirán aspectos diversos da astronomía, desde a observación práctica até a interpretación de cultos e mitos relacionados co ceo.
Para participar, é necesario realizar unha inscrición previa debido á capacidade limitada de prazas. Os interesados deben enviar un correo a auladanatureza@concellodeames.gal incluíndo o nome completo, teléfono de contacto e o lugar onde se collerá o bus. Recoméndase aos asistentes levar roupa cómoda, unha manta ou esterilla, e unha lanterna. A organización proporcionará telescopios para mellorar a experiencia de observación.
