Este mércores, 7 de agosto, arrancan en Bertamiráns as festas da Peregrina, que se prolongarán ata o domingo 11 de agosto, ofrecendo música e verbena para todos os públicos. Estes cinco días de celebracións súmanse aos cinco días de festa no Milladoiro coa Madalena, completando así dez días de troula no marco da programación ‘Ames en Festas’.
Os dous principais núcleos de Ames, O Milladoiro e Bertamiráns, celebran por terceiro ano consecutivo as súas festas de xeito conxunto. A iniciativa “Ames en Festas” é resultado da colaboración entre o Concello de Ames, as comisións de festas do Milladoiro e da Peregrina, e a Xuntanza de Empresarios de Ames (XEA).
As celebracións comezaron no Milladoiro coas festas da Madalena, que atraeron preto de 7.000 persoas grazas á actuación da Orquestra Panorama, e rematan hoxe coa actuación da Orquestra Gran Parada. A partir de mañá, Bertamiráns tomará o relevo coa Peregrina.
O mércores 7 de agosto, ás 23:00 horas, comezarán as festas en Bertamiráns coa actuación da Orquestra París de Noia e a Disco Móbil CDC no campo da festa da Peregrina. O xoves 8 continuará a troula coa Orquestra Los Satélites no mesmo lugar e hora.
O venres 9, ás 21:00 horas, o parque do Ameneiral acollerá o concerto de Guadi Galego. Posteriormente, ás 23:00 horas, a festa trasladarase de novo ao campo da Peregrina coa verbena a cargo de La Banda de Ayer e a discoteca móbil Impacto.
Para o sábado 10 de agosto, está programada a actuación da Requinta da Amaía e a Coral Lojo Batalla, seguidos de Los Coleguitas e a discoteca móbil Fabrik. As festas culminarán o domingo 11 coas actuacións de Airiños do Paseo de Colón, da Banda de Música de Lousame e da Orquestra Tania Veiras.
Ademais, os días 7, 8 e 9 de agosto, as rúas de Bertamiráns serán animadas polos pasarrúas das charangas A Santa Compaña, Os Celtas e a BBB de Ourense.
