Os compartamientos incívicos dalgúns turistas volven ser noticia en Santiago de Compostela despois de que este luns aparecese na fonte dos cabalos da Praza de Praterías unha pintada na que se podía ler ‘A e G bañáronse aquí‘, xunto a unha data. Cabe destacar que este martes a inscrición xa foi borrada da histórica fonte pola concesionaria do servizo de limpeza, Urbaser.
A imaxe da pintada, compartida en redes sociais este luns, chamou a atención dos internautas que expresaron o seu malestar ante este novo “acto vandálico”: “Está a perderse o respecto a todo”, “Unha tristeza”, “Que pena!!!”, son algúns dos comentarios difundidos polos usuarios de Facebook.
Esta polémica chega seis días despois de que tres peregrinos, Carmen, Fran e Camila, pintasen a frase ‘Aquí terminamos o Camiño de Santiago e empezamos o noso‘, acompañada da data na que chegaron ao Obradoiro.
Segundo explicaron fontes municipais a Europa Press, ante casos como os xa mencionados actúan “de inmediato” e tentan concienciar do carácter patrimonial de Santiago de Compostela, por exemplo coa campaña de boas prácticas turísticas que dará comezo en agosto.
Trátase dunha campaña na que dez informadores orientarán a pé de rúa aos turistas e peregrinos que cheguen á cidade baseándose no ‘Decálogo de Boas Prácticas’ lanzado o pasado verán polo goberno local para concienciar aos visitantes e mellorar a convivencia.
Deste xeito, fontes municipais piden “responsabilidade” ante este tipo de accións levadas a cabo no centro histórico da cidade , aínda que subliñan que tamén hai que “contextualizarlas”, xa que son miles as persoas que visitan Santiago e non todas realizan inscricións ou outro tipo de prácticas do estilo.
Nesta liña, a concelleira de Turismo, Míriam Louzao, asegurou que condenan “todos os actos vandálicos e de atentado contra o patrimonio” e que as campañas de concienciación “non obvian nin descartan” que para estes casos haxa sancións.
