Este verán, o Concello de Ames xunto ás comisións de festas da Madalena e da Peregrina e a Xuntanza de Empresarios de Ames, organizan por terceiro ano consecutivo “Ames en Festas 2024”, un programa de festexos que terá lugar dende o 2 ata o 11 de agosto. As festas da Madalena do Milladoiro celebraranse do venres 2 ao martes 6, seguidas polas festas da Peregrina de Bertamiráns, do mércores 7 ao domingo 11.
Entre as actuacións destacan as mellores orquestras de Galicia como Panorama, Gran Parada, Metrópolis, Combo Dominicano, París de Noia, Os Satélites e Los Coleguitas. Tamén haberá concertos de Guadi Galego, La Banda de Ayer e Tania Veiras. Este ano, como novidade, haberá dous pregóns, un nas festas do Milladoiro e outro nas de Bertamiráns.
O programa das festas foi presentado no anfiteatro do Milladoiro, con presenza do alcalde e concelleiro de Cultura, Blas García; María Vázquez, técnica do departamento de Cultura; e representantes das comisións de festas e da Xuntanza de Empresarios de Ames.
O festival Millarock marcará o inicio das festas o venres 2 de agosto, cunha serie de obradoiros musicais e concertos no anfiteatro do Milladoiro, incluíndo a actuación de Onda Dagda, e as actuacións de Biribirlocke, Agoraphobia e Dakidarría na Travesía do Porto.
O alcalde, Blas García, agradeceu o traballo das comisións de festas e destacou a importancia de traer as mellores orquestras para beneficiar o comercio e a hostalería local. Ademais, confirmou que a programación das festas tamén incluirá actividades deportivas como trofeos de fútbol e torneo de baloncesto 3×3.
Finalmente, as festas de Bertamiráns incluirán a segunda edición da Romaría Urbana o sábado 10 de agosto, cunha sesión vermú e concertos durante toda a tarde no parque do Ameneiral, ofrecendo así un espazo para o lecer e o disfrute de toda a veciñanza.
