O presidente da Xunta, Alfonso Rueda, reivindicou que o festival O Son do Camiño, que este xoves inicia a súa quinta edición, permite situar a Galicia “no top da música europea e internacional” e constitúe unha cita que contribúe a levar “a marca Galicia” —vinculada ao Xacobeo— por todo o mundo.
Rueda visitou este mediodía as instalacións do Monte do Gozo, onde se celebrará este certame que reunirá a 40.000 asistentes entre mañá e o vindeiro sábado.
Nas distintas xornadas, actuarán artistas como Green Day, Love of Lesbian, Baiuca, Pet Shop Boys, Melendi, Ana Mena, Myke Towers, J Balvin ou Thirty Seconds to Mars.
O titular do Goberno galego fixo fincapé na importancia deste festival á hora de atraer visitantes á comunidade, o que se reflicte nunha elevada taxa de ocupación hoteleira.
“Son tres días para gozar e nos que Galicia vai estar posta no mapa a través da música”, concluíu.
