O Son Do Camiño consolídase como o festival máis destacado de Galicia e un dos máis importantes de España, sendo o único que será retrasmitido de xeito oficial por Televisión Española. A cadea pública anunciou que La2 transmitirá en directo o esperado concerto dos Pet Shop Boys, engadindo un novo valor ao festival galego.
O concerto dos Pet Shop Boys será retransmitido este venres 31 de maio ás 23:00, cunha duración de 1 hora e 40 minutos. Ademais desta retransmisión na TV pública, o festival emitirá sete concertos a través da súa canle de YouTube O Son Do Camiño TV. Estas retransmisións contan co respaldo cultural da Xunta de Galicia, Xacobeo e Estrella Galicia, patrocinadores principais destas emisións.
O Son Do Camiño celebrarase en Santiago os días 30 e 31 de maio e o 1 de xuño, marcando o punto culminante do calendario musical galego. Cos abonos xerais e as entradas para o xoves e sábado xa esgotados, actualmente están dispoñibles as últimas entradas para o venres, así como as últimas opcións para a zona de descanso e glamping.
O cartel deste ano inclúe máis de 40 artistas internacionais de primeiro nivel, destacando nomes como Green Day, J Balvin, Thirty Seconds To Mars, Myke Towers, Melendi, Pet Shop Boys, Rels B, Ana Mena e La Oreja de Van Gogh, entre outros. Unha das grandes novidades desta edición é o desenvolvemento e crecemento do terceiro escenario: Escenario Son Electro By Repsol. Dedicado exclusivamente á música electrónica, este novo espazo promete unha programación excepcional con artistas de renome internacional como Trym, Vitalic (Live), Patrick Mason, Tiga, Henrick Schwarz e Kalte Liebe, Ben Hemsley, Daria Kolosova, entre outros.
O Son Do Camiño é un festival creado por e para Galicia, promovido polas empresas galegas Esmerarte Industrias Creativas e Bring The Noise, co apoio activo da Xunta de Galicia e o Xacobeo. Dende a súa primeira edición en 2018, o festival converteu a Santiago nunha das capitais da música en directo en Europa cada mes de xuño.
O Son Do Camiño 2024 contará de novo con Estrella Galicia como principal patrocinador privado. A empresa de cervexa leva colaborando co festival dende a súa primeira edición, sendo xa, como marca galega, parte da experiencia do mesmo. Aposta pola cultura da cervexa dentro de O Son Do Camiño sento unha peza clave na experiencia do mesmo.
O Son Do Camiño 2024 incorpora nesta edición a Repsol como partner multienerxía co obxectivo de reducir as emisións de dióxido de carbono do festival: a compañía subministrará combustible 100% renovable para os grupos electróxenos do escenario Son Electro by Repsol e montará unha instalación na que, a través de enerxía solar, os asistentes poderán vivir unha experiencia recreativa e cargar os seus dispositivos móbiles.
Pola súa banda a cooperativa social Mulleres Colleiteiras recollerá o aceite de cociña usado nos foodtrucks para que a compañía multienerxética fabrique con eles combustible renovable, fomentando así a economía circular.
