A Xunta e a Facultade de Ciencias da Educación da Universidade de Santiago de Compostela colaborarán na musealización de parte dos fondos da institución académica a través do Museo Pedagóxico de Galicia (Mupega), dependente da Consellería de Educación.
Así o acordaron este venres o conselleiro Román Rodríguez e a decana da Facultade de Ciencias da Educación, María del Mar Lorenzo, nunha reunión á que tamén asistiu o secretario xeral de Universidades, José Alberto Díez.
Ademais desta colaboración, que se formalizará a través dun convenio específico, no encontro, o conselleiro tamén se comprometeu a que o seu departamento colaborará nos actos de celebración do 50 aniversario da creación da facultade.
Así mesmo, a Consellería de Educación vai dotar á facultade dun Polo Creativo como o que xa dispoñen os centros educativos galegos. Isto vai permitir que o alumnado universitario se familiarice con metodoloxías innovadoras a través destes espazos tecnolóxicos.
